أكد الرئيس عبدالفتاح السيسي إنه يحترم أهل دمياط لعلمهم والتزامهم وجهدهم، وقال: "دمياط مكان ومدينة وناس ليهم تقدير واحترام شديد جدا فى وجدان كل المصريين وعندى أنا شخصيًا بعملهم والتزامهم وجهدهم".

وأضاف خلال افتتاح عدد من المشروعات القومية بالمحافظة اليوم الثلاثاء: "مدينة الأثاث لما اتعملت كنت بحلم إن إحنا نخش عالمية الأثاث مش محلية الأثاث .. يا ترى فيه ناس بتستورد أثاث لصالح المصريين.. أيوه.. طالما أه يبقى محققناش الرضا فى صناعة الأثاث لمصر ولكل الأذواق وكل المستويات.. أنا بحلم بعالمية الأثاث .. إيه يا بتوع دمياط معندكوش حلم .. وكلامى لكل المصريين هي الناس ابتدت تبطل تحلم ولا إيه؟ الناس بطلت تحلم وتجرى على حلمها.. اللى انتوا بتشوفها ده حلم أنا حلمته من سنين كتيرة فاتت والعشوائيات اللى بنحلها حلم حلمته وأنا صغير من 40 سنة قلت لا يمكن أن يبقى فيه ناس مرمية فى الشارع كده ولما جت الفرصة وبقيت فى مكانى جريت على حلمى وربنا مكنى".

وتابع: "مغيرناش كتير فى تطوير الأثاث وكانت الفكرة موجودة إن احنا نعمل مركز للتطوير علشان يبقى نطور إنتاجنا للسوق المصرى والعالمى.. كنت متصور ان الناس هتطلب عدد كمان من الورش .. حد يقول السوق مريح ومشاكل ولكن لن تنتهى المشاكل ودورنا التصدى لهذه المشاكل والمعوقات من خلال التشريعات والاجراءات لحماية الصناعة وتطوريها".

وافتتح الرئيس السيسي اليوم الثلاثاء عددا من المشروعات بمحافظة دمياط، بحضور عدد من الوزراء وكبار رجال الدولة، وأجر الرئيس جولة تفقدية للمشروعات القومية بالمحافظة زار خلالها مدينة الأثاث، وشاهد منتجات المدينية من اثاث خشبي .
شملت المشروعات التي افتتحها الرئيس كلا من محطة كهرباء غرب دمياط متعددة الأغراض، وحدات سكنية في دمياط الجديدة، مركز للتعليم المدني، فندق منطقة اللسان الذي يعتبر أول فندق 5 نجوم بمنطقة محافظات الدلتا، والرصيف البحري متعدد المهام بميناء دمياط.