اوعى اوعى ظلم النفس في الأشهر الحُرم، ليه؟، يُغضب ربنا سبحانه وتعالى، دي الأشهر الحُرم اللي حرّم فيها ظلم النفس، اللي حرّم فيها المعاصي الكبيرة.

يعني إيه؟، ﴿ فلا تظلموا فيهن أنفسكم ﴾، يعني اتقوا الله، ممكن تراقب تقوى الله بالذات في الكبائر؟، ممكن: اوعى تقرب من العلاقات الحرام، اوعى اوعى، اتقِ الله في علاقاتك، اتقِ الله اوعى تشرب حاجة من شُرب أو مخدرات أو غيره، غُض بصرك، اتقِ الله في مراتك، عاملها كويس، اتقِ الله في لسانك.

ممكن تتقِ الله، اتقِ الله في صلاتك، حافظ على صلواتك الخمسة، حافظ على صلاة الفجر، مش مية في المية، مفيش تقوى الله مية في المية؛ إحنا بشر، وربنا اللي بيقول: ﴿ فاتقوا الله ما استطعتم ﴾.

ستين في المية حلو، سبعين في المية رائع، برافو، أنت في طريق التقوى، طب وقعت في التقوى في شهر رجب؟، اجري بسرعة، استغفر على طول، استغفار، عشان ترجع للتقوى تاني؛ لأنك أول ما بتستغفر ربنا بيرجعك للتقوى، بس خلي بالك، أنت في الأشهر الحُرم، أنت عمرك ما خدت بالك من كلمة الأشهر الحُرم، ويمكن ما قدرتهاش، لكن ربنا قدّرها قوي ﴿ إن عدة الشهور عند الله اثنا عشر شهرًا في كتاب الله يوم خلق السماوات والأرض منها أربعة حُرم فلا تظلموا فيهن أنفسكم ﴾.

الكاتبة والمحررة الإعلامية الدكتورة دينا المصري