التدخل بين زوجين متفاهمين على طريقة حياتهم حاجة مش لطيفة، مراتك مابتعرفش تطبخ هتعملها الأكل انت ولا ايه؛ إيه يا بني؟، انتم كل أكلكم من برا؟، مراتك بتخرج كتير ليه كده، مراتك مخلصة فلوسك على صحابها وأهلها بعزوماتها وهتخرب بيتك كده، إيه الطريقة اللي بتربوا بيها دي؟، العيال هتطلع مايعة؟، انت بتسيبها تخرج كتير ليه؟، دي بتصرف كتير، دي بخيلة مش عايزة تحط من فلوسها ف مصاريف البيت خالص ليه كده، دي مبهدلة في نفسها، هي مش مهتمة بيك ليه؟، إزاي سايبها تروح لأهلها كتير كده؟، إزاي سايبها تتأخر عند أهلها كده، إزاي سايبها تسافر أو تشتغل أو تعمل أي بتنجان كدة؟، إزاي تدفع مبلغ زي ده في حاجة تافهة؟.

جوزك بخيل ومبيهتمش بيكي، شوفتى فلان جاب لمراتة هدية ايه وجوزك معبركيش إزاى؟، وانتِ بقى جوزك ابن أمه ولا بيسمع كلامك؟، إزاى جوزك يسافر ويسيبك لوحدك؟، جوزك بيخرجك بقى ولا ايه، جوزك بيديكي مصروف خاص بيكي بقى ولا ايه.

يا جماعة انتم مالكم والله؟، اتنين ربنا هاديهم لبعض وراضيين عن حياتهم، انتم مالكم؛ ممكن زوجة تبقى راضية عن اللى زوجها بيعملة أو زوج بيدلع مراته بشكل معين، حد يتدخل يبقى سبب للمقارنات و منع الود بينهم، انتم عارفين جزاء اللي بيوقع بين زوجين أو بيقلبهم على بعض إيه؟.

سيبوا البيوت المتفاهمة الآمنة المطمئنة عايشة وخلوكم في حالكم الله يبارك لكم، ورسالة للزوج والزوجة: بلاش تقعد تحكي كل حاجه بتحصل مع مراتك أو بتعملها لمراتك قدام أهلك هما بيحبوك على عينا وعلى راسنا بس ده أول سبب أقسم بالله لبداية المشاكل فاقطعه.

بلاش تقعدي تحكي قدام أهلك حماتك عملت أيه معاكي وجوزك غير رأيه في أي ومعملش أيه وتصغريه قدام أهلك وتقوي قلبهم عليه ويفضلو يسخنوكي عليه أو على أهله، أهلكو مش من حقهم يعرفو عنكم حاجة غير أنتوا كويسين وبخير والحمدلله.. أكتر من كده تطفل، أكتر من كده أنت بتجيب المشاكل لبيتك بأيدك وأنت مش حاسس.

الكاتبة والمحررة الإعلامية الدكتورة دينا المصري