أنتي 30 سنة دلوقتي؟، طيب واللي هناك دي 40 سنة صح؟، وإنتي اللي ورا؛ أيوه إنتي 50 سنة صح؟،
كل ده مش مهم ومش مقياس لشكل حياتك وليكي عموما.

طيب نركز بقى كويس، عشان مفيش وقت للتفكير ولا التردد، أنتي دلوقتي في المرحلة الفاصلة اللي بتحدد جودة السنين الجاية من عمرك. يا تعيشيهم ملكة وقوية ومش محتاجة لمخلوق.. يا تتحولي لنسخة باهتة بتدور على اللي يسندها، وقاعده مستنية الفرج والي يديها ويساعدها وهي مكانها ولأنك بتكوي عجزتي وراحت عليكي كل الي حواليكي هيعمل مش شايف ولا سامعك اصلا عشان كده بقول اختاري نفسك من الأول وبس.

أنا هنا عشان أديكي الـ 10 أوامر الحديدية اللي مفيش حد هيقولهم لك بوضوح عشان تفضلي قوية في أي سن:

الأوامر العشرة لـ(النسخة الأقوى منك):

الصلاة هي الـتأمين: دي الورقة الكسبانة الوحيدة في الدنيا والآخرة.. مهما كانت غلطاتك صلاتك هي الحبل اللي هيسندك لما الكل يتخلى عنك

الرياضة مش رفاهية: جسمك لو ماتحركش بيصدي . المشي السريع نص ساعة يومياً ده صيانة لمفاصلك عشان ماتخونكيش بعدين.

الميه أولوية: بطلي جفاف.. نقص الميه هو السر ورا كرمشة الجلد ووجع الكلى والمفاصل. خلي جسمك مروي دايماً

العقل عضلة: لو سيبتيه هيصدي.. اقرأي و اتعلمي لغة و فكري.. التحدي الذهني هو اللي بيأخر شيخوخة العقل

شبعك هو عدوك: كلي اللي نفسك فيه بس وقفي قبل ما تشبعي.. تخمة المعدة هي اللي بتقسم الضهر وتجيب الأمراض

اعتزلي ما يؤذيكي: الزعل والنكد بياكلوا في صحتك وبيخطفوا نور وشك.. طنشي عشان صحتك النفسية أهم من إنك تثبتي إنك صح في حاجات كتير متستاهلش تاخد مساحه ولو قد عقلك الاصبع للتفكير فيها من الاساس تغافلي عن الحقيقه عشان ترتاحي بس اول مالصوره توضح قدامك كامله وانتي عامله مش فاهمه وقتها اعلني قرارك وكفي عن صمتك وامشي واقفلي وراكي الباب بلا رجعه ،

فلوسك لخدمتك: حطي مالك في الشمس واقعدي في الضل..
متسمحيش لحد يستغلك حتي لو كان باسم الحب وياخد فلوسك ويتعود علي ده ويبقي حق مشروع بالنسباله، فلوسك اتعملت عشان تستمتعي بيها إنتي وعيلتك مش عشان تكنزيها وتتحرمي منها ولا تصرفيها علي شيء ميستاهلش وتضيعيها ببلاش.

الماضي زبالة: بطلي ندم على اللي فات والي رمتيه ورا ضهرك او خسرتي وقتك مع ناس مش شبهك أو حتي اللي محققتيهوش عموما، الحسرة بتضيع متعة اللي جاي، تجاهلي وركزي في دلوقتي وبس لأنه أحلى أكيد

الحجامة وقاية: سنة نبوية وديتوكس طبيعي لجسمك من السموم والدم الراكد.. خليها عادة سنوية وصيانة دورية

الشيب وقار: شعرك الأبيض لما يبدا يطلع مش نهاية العالم ده بداية سن الخبرة والاستمتاع الحقيقي.. سافري واتبسطي الحياة لسه فيها كتير

القرار في إيدك دلوقتي..

بصي لنفسك في المراية.. هل هتفضلي مكانك لحد ما المرض يكسرك؟ ولا هتبدأي القواعد الحديدية وتعيشي حياتك ملكة ومحدش يقدر عليكي؟

انقذي الملكة اللي جواكي وبطلي تضحي بصحتك علي اي شيء في الدنيا ميستاهلش، واعرفي إن أنتي بس الوحيدة اللي تستاهل.

الكاتبة والمحررة الإعلامية الدكتورة دينا المصري