قبل ما ترتبط بمطلقة، اسأل نفسك السؤال اللي ناس كتير بتنساه، متدخلش حياة ست مطلقة وأنت ناوي تغيّرها على مزاجك بعد الجواز.

لو هي مطلقة من غير أولاد، فغالبًا بتبدأ معاك صفحة جديدة من أول السطر، لكن لو معاها أولاد، فهنا لازم تكون صريح مع نفسك قبل ما تكون صريح معاها، هل أنت متقبل إنها أم قبل أي حاجة؟، ولا متخيل إن أول ما تتجوزها هتنسى مسئولياتها وتبقى كل حياتها حواليك؟.

هل هتتفهم إن اهتمامها بأولادها مش معناه إنها مقصرة معاك؟، وإن أي أم طبيعية أولادها هيبقوا جزء أساسي من يومها وتفكيرها وقراراتها؟، هل هتتقبل إن أولادها ممكن يحتاجوها في أي وقت؟، وإن ده مش تقليل منك، ده اسمه أمومة؟، ولو كان فيه تواصل بين الأولاد ووالدهم، هل هتعرف تفرق بين علاقة زوجية انتهت، وبين أب لسه عنده مسئولية تجاه أولاده؟، ولا كل مكالمة وكل تواصل هيتحول لمشكلة وخناقة وتحقيق؟.

الحقيقة اللي لازم تتقال بوضوح: لو أنت متضايق من الحاجات دي من البداية، فمتدخلش العلاقة أصلًا، لأنك مش هتتعب نفسك بس، انت كمان هتتعب ست بتحاول تبني حياة مستقرة وتحافظ على أولادها في نفس الوقت.

الخلاصة: اختار العلاقة اللي أنت متقبل تفاصيلها، مش العلاقة اللي ناوي تغيّر تفاصيلها بعد الجواز، لأن الأم الحقيقية مش هتبطل تبقى أم عشان ترضي حد، ولو هي تستاهل الحب فعلًا يبقى لازم تتقبل الجزء ده فيها من أول يوم.

الكاتبة والمحررة الإعلامية الدكتورة دينا المصري