الوحدة واليُتم… لما تبقى لوحدك وأهلك عايشين

في ناس كتير فاكرة إن اليُتم يعني إن الأب أو الأم ماتوا، بس الحقيقة إن في نوع تاني من اليُتم أصعب بكتير، إن أهلك يكونوا عايشين، وانت حاسس إنك لوحدك في الدنيا، حاسس إن مفيش حد شايفك بجد، مفيش حد سامع وجعك، مفيش حد بيحضنك لما تتكسر، ولا يطبطب عليك لما تتعب.

تبقى وسط ناس كتير، وعندك نجاح، وشهرة، وحب من الجمهور، والناس كلها بتقول: “يا بختك.. أنت محظوظ"، بس جواك صوت بيصرخ: “أنا تعبان.. أنا محتاج حد جنبي”.

الوحدة في آخر الليل، أصعب وقت على الإنسان الوحيد هو آخر الليل، لما كل الأصوات تسكت، والموبايل يهدى، والضحكة تختفي، والأقنعة تقع، تفضل قاعد تبص في السقف، تراجع حياتك، تسأل نفسك: “هو أنا ليه دايمًا قوي؟، ليه محدش شايف ضعفي؟، ليه أنا دايمًا السند ومفيش سند ليا؟”، تحس إنك شبعان تصفيق، بس جعان حُب، شبعان كلام حلو بس محروم من حضن صادق.

نجاح من بره وفراغ من جوه، الإنسان الوحيد ممكن يبقى أنجح واحد في الدنيا، يضحك قدام الناس، يهزر، ينجح، يحقق أحلامه، بس لما يقفل الباب على نفسه يحس إنه فاضي، زي بيت شكله جميل من بره، بس مفيهوش روح، نجاحه ما بيدفيش، فلوسه ما بتطمنش، وشهرتُه ما بتشيلش خوفه، لأنه ببساطة مفيش حد يرجعله ويقول له: “أنا فخور بيك عشانك مش عشان اسمك”.

إيه اللي بيحصل للإنسان الوحيد؟، الوحدة الطويلة بتعمل حاجات خطيرة: تخليك تعتمد على نفسك زيادة عن اللزوم، تخليك تخاف تطلب مساعدة، تخليك تمثل القوة طول الوقت، تخليك تشك في حب الناس، تخليك تحس إنك عبء لو اشتكيت، وتبدأ تقول: “أنا مش محتاج حد”، بس الحقيقة أنت محتاج، بس اتعودت تكتم.

الوحدة مش ضعف، الاعتراف بيها شجاعة، أكبر كذبة في الدنيا إن القوي ما يحسش بالوحدة، لا؛ القوي أكتر واحد تعب، القوي هو اللي اتخذل كتير ولسه واقف، اللي اتساب ولسه بيدّي، اللي اتوجع ولسه بيحب، الوحدة مش عيب، العيب إنك تسيبها تاكلك من جواك.

إزاي تتغلب على الشعور ده؟، خطوات حقيقية

اعترف لنفسك الأول، قول: “أنا وحيد ومحتاج حد"، من غير كسوف، الاعتراف بداية العلاج، اختار ناس شبه قلبك، مش كل الناس تنفع قُرب، دور على اللي يسمع، اللي ما يحكمش، اللي ما يستغلش ضعفك، شخص واحد صادق أغلى من مية مزيف.

قرّب من ربنا بصدق؛ لما الدنيا كلها تقفلك بابها باب ربنا دايمًا مفتوح، فضفض، ادعي، عيّط، اشتكي، هتحس بسند عمرك ما حسيت بيه قبل كده.

اتعلم تحب نفسك، ما تستناش حد يديك قيمة، انت قيمة لوحدك، تعبك له معنى، وجودك مهم، عامل نفسك زي ما بتعامل أقرب الناس ليك.

اسمح لنفسك تكون ضعيف أحيانًا، مش لازم تبقى بطل كل يوم، مسموح تتعب، مسموح تقع، مسموح تقول “مش قادر”، ده مش ضعف ده إنسانية.

في الآخر رسالة لكل إنسان وحيد، لو حاسس إنك يتيم وانت أهلك عايشين، لو حاسس إنك لوحدك وسط الزحمة، لو حاسس إن قلبك تعبان؛ أحب أقولك: انت مش لوحدك، في ناس شبهك، في قلوب حاسة بيك، وفي رب عمره ما يسيبك، يمكن اتأخرت الطبطبة، بس جاية، يمكن السند اتأخر، بس موجود، اصبر على قلبك هو تعب كتير، وافتكر دايمًا: الإنسان اللي عاش الوحدة لما يحب بجد، بيحب من قلبه كله.

الكاتبة والمحررة الإعلامية الدكتورة دينا المصري