هاتي جوزك جنبك، اللي عالطول ماسك تليفونه ومبيسبهوش من إيده، الكلمتين دول عشانه، الحقيقة إن الموضوع ده مؤذي، رغم إنه بيبان بسيط.

إنت كزوج، بتكون تعبان طول النهار في الشغل، وما بتصدق ترجع البيت عشان تفصل وتريح شوية، وده من حقك فعلًا، لكن ده مش معناه إنك تتخلى عن دورك كزوج وأب، زوجتك عندها احتياجات مهمة جدًا، محتاجة تفضفض، محتاجة حد يسمع حكاياتها حتى لو مش مترتبة، محتاجة تحكي عن تعبها مع الولاد طول اليوم، محتاجة منك كلمتين يطيبوا خاطرها، محتاجة تقول لها، رأيك في حاجة هي مستنية رأيك فيها، محتاجة تسمع منك كلمتين حلوين، محتاجة تحس إنك شريك في تفاصيل يومها.

الكلام ده مش رفاهية، ومش حاجات تافهة، ولما هي بتطلب منك ده، ده مش معناه إنها مش مقدرة تعبك، بالعكس هي فعلًا محتاجة ده لأن الكلام معاك بالنسبة لها لغة حب وتواصل وإحساس بالأمان والانتماء، والولاد كمان محتاجينك، محتاجينك تتكلم معاهم، تلعب معاهم، تحل مشاكلهم الصغيرة اللي بالنسبة لهم كبيرة جدًا، تشوف الرسمة اللي رسموها وتقول رأيك فيها، تسمع شكواهم البريئة، وتشارك أمهم مسؤولية تربيتهم.

دورك في البيت، أكبر من مجرد إنك تجيب فلوس، وطول ما إنت مختزل دورك في الإنفاق فقط، هتفضل شايف احتياجاتهم دي تافهة، وهتشوف طلبهم منك اهتمام، كأنه عدم تقدير لتعبك، أو حمل زيادة عليك، وده مش حقيقي.

افصل وريّح شوية، لكن بعد ما ترتاح، بص لأهل بيتك، شوف هم محتاجين إيه، تلبية الاحتياجات دي، مش محتاجة زوج متفرغ، لكن محتاجة شوية تركيز، وشوية حضور، وشوية إحسان في استغلال الوقت اللي بنسميه "Quality Time"، وقبل كل ده محتاجة إنك تكون مؤمن إن وجودك النفسي أهم من وجودك المادي.

أهل بيتك اللي إنت تعبان عشانهم طول اليوم، محتاجين منك حاجات تانية، زي احتياجهم للفلوس.

الكاتبة والمحررة الإعلامية الدكتورة دينا المصري