أكتر حاجة غريبة في الزواج، إننا بنجتهد برا، ونكسل في الحلال، بنلبس حلو عشان الناس، نختار كلامنا بعناية عشان الشغل، نبتسم ونجامل، ولما نيجي لأقرب شخص لينا؟، “أنا تعبان/ة”، “مش فاضي/ة”، بعدين، بعدين إيه؟، هو في ضمان إن في “بعدين” أصلاً؟، الكلمة الحلوة اللي مأجلة، كان ممكن تغيّر يوم، الاهتمام البسيط كان ممكن يصلّح مسافة، الضحكة كانت ممكن تنقذ علاقة.

الحب مش إحساس بس، الحب تصرفات يومية صغيرة بتتكرر، فبلاش كسل في الحلال، وبلاش نعتبر إن شريك الحياة “مضمون”، انبسطوا ببعض، قولوا… اعملوا… عبّروا.... اهتموا، قبل ما تبقى العلاقة روتين ساكت أو ذكريات، الحياة أقصر من إننا نحب بنص قلب، التعبير عن الحب مش رفاهية… ده احتياج أساسي.

علميًا، الدراسات بتقول إن الكلمة الطيبة، اللمسة، والاهتمام اليومي بيرفعوا هرمونات زي “الأوكسيتوسين” اللي مسؤول عن الأمان والارتباط العاطفي، ببساطة؟، اهتمامك الصغير بيعمل فرق كبير في قلب شريكك.

قال رسول الله ﷺ: “وفي بُضع أحدكم صدقة”، يعني حتى القرب والمودة بين الزوجين، عبادة يؤجر عليها الإنسان، وكأن الرسالة واضحة: الحب مش بس شعور، الحب فعل وقرب كمان، طيب ليه بنكسل في الحلال؟، ليه نأجل كلمة حلوة أو حضن أو تقدير؟، الحياة أقصر من التأجيل، وأبسط الحاجات هي اللي بتبني العلاقة أو تهدّها.

الكاتبة والمحررة الإعلامية الدكتورة دينا المصري