حقيقة القلب المكسور، وجع بتسخروا منه وهو بيدخل مستشفيات، القلب المكسور مش حكاية عاطفية زيادة عن اللزوم، ولا حالة نفسية وخلاص، القلب المكسور وجع حقيقي، مرض بيصيب القلب بجد، مش مجرد إحساس، الناس اتعودت تستهين بوجع القلب، يمكن عشان مش شايفاه، أو عشان أسهل حاجة عندهم يقللوا من ألم غيرهم.

لكن الحقيقة إن في قلوب اتكسرت من كلمة، ومن خضة، ومن زعل ما اتلحقش، الكلام أكتر حاجة بتكسر، كتير من وجع القلب بييجي من كلام ناس اتقال عليك، كلام اتقال من وراك، أو قدامك بس في لحظة ضعف، كلمة شك، استهانة، خذلان، كلهم ممكن يعملوا خضة، والخضة دي بتكسر القلب كسرة صعبة، مش كل الجروح بتيجي من أفعال، في جروح بتدخل من الكلام، وتفضل ساكنة جوه سنين، كسرة القلب بتزور الستات أكتر، الواقع إن كسرة القلب بتزور الستات أكتر من الرجالة، مش لأن الست أضعف، بالعكس؛ لكن لأنها بتحس أكتر، وتدي أكتر، وتستحمل لآخر نفس فيها لحد متخلص حرفيا.

الست ممكن تكمل وهي موجوعة، وتضحك وهي مكسورة، وتخبي وجعها عشان اللي حواليها.
فتبان انها قويه ومبتتهزش، لكن لما القلب عندها بيتكسر، الكسرة بتبقى عميقة، أما الراجل، فلو كسرة القلب زارته بيبقى الوجع تقيل، تقيل لأنه مش متعود يطلع اللي جواه، ولا يعترف إنه موجوع، سكوته بيخلي الوجع يتراكم، لحد ما يظهر في شكل تعب حقيقي، القلب المكسور مش حالة نفسية
لا ده مرض حقيقي بيصيب القلب.

وجع القلب ممكن يدخّل الإنسان مستشفيات، ييجي في صورة نهجان مفاجئ، قبضة قلب، ألم في الصدر، إرهاق شديد من غير سبب، وفي حالات كتير الأطباء نفسهم بيأكدوا إن الزعل الشديد والخضة ممكن يأثروا على عضلة القلب، يعني اللي بيتقال عليه “كبر دماغك”، ممكن يكون فعليًا تعبان ومحتاج علاج.

ليه وجع القلب صعب؟؛ لأنه وجع ما بيتشافش متداري ومستخبي ورا ضحكة مصطنعة عشان شكلك قدام الناس وقدام نفسك انت عمال تقاوح وانت كل ليلة من الزعل قلبك بيتحول لفتات قلب المفروض يكون سليم مش مشرخ زي البيت المهجور، مفيش تحليل يطلع الوجع اللي جوه، ولا أشعة تبين الخذلان، هو وجع بيطلع في النفس، في النفس القصير، في القلب اللي بيدق زيادة، وفي جسم بيصرخ وإحنا ساكتين، العلاج الحقيقي، علاج القلب المكسور مش تجاهل، ولا تمثيل إننا تمام.

العلاج إنك تعترف إنك اتوجعت، تبعد عن أي حد استهان بوجعك، تحمي قلبك من الكلام المؤذي
تدي نفسك حقها في الزعل، وتقرب من ربنا، لأنه الوحيد اللي بيجبر الكسر من غير ما يوجعك تاني
في الآخر القلب المكسور مش دلع، ولا ضعف، ولا حالة مؤقتة، القلب المكسور وجع بجد، واللي استهان بيه، عمره ما داقه ولا حس بمرارة الدقه وهي طالعه تكسر ضلوعك؛ فارحم نفسك وارحم قلبك معاك.

الكاتبة والمحررة الإعلامية الدكتورة دينا المصري