في الدنيا قانون ما بيغلطش: أي نعمة ما تتقدّرش، بتضيع، وأي حاجة ناخدها كده على إنها مضمونة، بنفقدها من غير ما نحس، ناس كتير عايشة وهي فاكرة إن اللي في حياتها ده حق مكتسب: الحب حق، الاهتمام واجب، العِشرة مفروغ منها، والصحة عمرها ما هتروح، ومن هنا الغلط بيبتدي، قبل الخسارة بكتير.

الإهمال أول طريق الضياع، الإهمال مش دايمًا خيانة أو قسوة واضحة، أوقات بيبقى في البرود، في التجاهل، في التأجيل، في الاعتياد اللي بيقتل أي حاجة حلوة، إن حد يكون بيحبك بصدق وإنت متطمن لوجوده ومش شايفه، إن ربنا يديك موهبة وإنت مهملها، إن تعيش في أمان وإنت بتتذمر طول الوقت، كل ده إهمال نعم.والنعمة مهما استحملت، ليها آخر، في وقت ما بتنسحب بهدوء من غير خناق، من غير صوت، بس بتمشي.

الفقد مش بييجي فجأة، اللي فاكر إن الخسارة بتيجي مرة واحدة غلطان، هي بتيجي بعد تراكمات، بعد “مش وقته”، بعد “بعدين”، بعد كل مرة قصّرت وما اعتذرتش، وبعد كل مرة استهنت بحاجة جميلة.

وفجأة تلاقي نفسك بتدور على حاجة كانت في إيدك طول الوقت، ومش لاقيها، لما النعمة تتسحب؟، أوجع إحساس مش إن الحاجة تروح، إنك تفهم قيمتها بعد ما تمشي، تفتكر شخص ما حافَظتش عليه، تندم على فرصة ضيّعتها، تشتاق لأيام كنت بتشتكي منها، ساعتها بس بنعرف إن النعمة مش في وجودها، النعمة في تقديرها، الشكر مش كلام، الشكر مش “الحمد لله” وبس، الشكر تصرّف، اهتمام، حفاظ، خوف من الفقد، وتقدير قبل ما الحاجة تمشي، إنك تحس إن اللي في حياتك ده مش مضمون، وإن ربنا ممكن يشيله في أي وقت.

(الخلاصة)

اللي يهمل النِعم ما بيتعاقبش، هو بيتعلّم بالطريقة الصعبة، بيتعلّم لما الحاجة تروح، والشخص يمشي، والفرصة تتقفل، الذكاء الحقيقي مش إنك تزعل على اللي ضاع، الذكاء إنك تلحق تحافظ على اللي لسه موجود، قبل ما يتحول هو كمان لوجع وذكرى.

الكاتبة والمحررة الإعلامية الدكتورة دينا المصري